Árið 2017 samþykkti Alþingi lög um jafnlaunavottun sem tóku gildi 1. janúar 2018. Meginmarkmið jafnlaunavottunar er að vinna gegn kynbundnum launamun og stuðla að jafnrétti kynjanna á vinnumarkaði. Undirbúningur vottunarferlis er hafinn innan bankans og miðar sú vinna að því að Landsbankinn öðlist vottun á árinu 2018. Jafnréttisstefna Landsbankans og aðgerðaáætlun stefnunnar er til skoðunar og endurmats, meðal annars með hliðsjón af þeirri vitundarvakningu sem frásagnir #metoo hafa komið til leiðar. Sjá nánari umfjöllun um #metoo og jafnrétti í kaflanum Álitamál í þessari skýrslu.

Landsbankinn hefur unnið markvisst að jafnréttismálum í gegnum tíðina og birt eigin greiningar á launum kynjanna. Það er skýrt í starfsemi bankans að karlar og konur skuli hafa jafna möguleika til starfsframa, njóta sömu réttinda í starfi og að konum og körlum skuli greidd sömu laun fyrir jafn verðmæt störf. Þá líðast hvorki einelti, fordómar né kynbundin eða kynferðisleg áreitni í bankanum.

Jafnréttisáætlun Landsbankans miðar að því að allir séu jafn réttháir, án mismununar á grundvelli kyns, kyngervis, kynvitundar, kynhneigðar, aldurs, fötlunar, heilsufars, þjóðernis, kynþáttar, litarháttar, uppruna, trúarbragða, skoðana, menningar eða stöðu að öðru leyti, enda lítilsvirðir og misbýður slík mismunun þeim einstaklingi eða hópi sem fyrir henni verður.